hermkes romanboutique

von Gerdam 4. April 2025

Podcast: Play in new window | Download (Duration: 7:36 — 6.3MB)

Subscribe: RSS | More

Vom Låden und vom Leben Nummer 33 – Hammersbald

(…wie immer zum hören und mitlesen oder lesen und mithören, ganz wie ihr wollt)

Vom Låden und vom Leben
(audiofile #33: Hammersbald)

Servus ihr Liem dord draußen, nach enner ungewöhnlich langen Bause, meld ich mich heud amål widder zurügg.

Oder a so gsåchd, heud müsserder hald amål widder mid mir vorlieb nemm.

Weil die ledzdn Wochn warn erfülld vo modiwierde und unnerhaldsame Beidräch vom Börnie. Supper Deemen, garnierd mid schlaun un ellogwendn Gschbrächsbaddnern.

Ich habb die Beidräch mid Freud gschniddn. Hadd a mir so richdich Schbass gmachd.

Gleichzeidich hadd mir die lange Greadiefbause a erlaubd, drüwer wegzumdeusch, dass ich im Momend blos a Abbendix bin. Däs is kä fränngischer Gallier, sondern der Wurmvordsadz vo unnerm Blindarm. Üwerflüssich, für nix guud und a noch lässdich, weil, wenner was hadd, nacherd brauchder a noch Aufmerksamkeid. Also bin ich känner vo denne putzich liemswerdn, gallischn Supperheldn. Und leider bin ich a känner vo denne annern Subberheldn, vo üwerm grosse Deich. A wenn die sich bein Deil vo ihrm Muldiwerrsum bei "unnern" nordischn Göddersåchn bedien du. Was ich ja a gern mach. Ned umsonsd is ennes vo mein Liewlingsdischörds sozumsach a Subberheldnfänschörd. "Hammersbald" der (fränggisch)nordische Godd der Ungeduld. Bassd normalerweise ganz gud zu mir und auf mich. Geduld is nämmlich ungefähr des Gechndeil von enner Subberheldnfähichkeid, wo in mir schlummern dud. Also wennse schlummerd, isses höchsdns so a Ard Dorrnröschenschlåf, bloß diefer und länger.

Blöderweise wär des edz genau die Fähichkeid der Schdunde. Beziehungsweise des Monaz oder a des Jåhres. Könnd ich brauchn. Mehr wie a weng davo. Der ganze Missd dauerd gfühld ewich. Gud drei Monadde sin edz scho vorbei, seid mein drecks Unfall. Drei Monadde, wo ich nedd nur annern zur Lassd fall, sondern vor allm und ganz besonders mir selwer. Weil ich kanns eefach fassd ned erdråch, fassd nix mach zumm könn. Und alles was ich mach du nacherd so langsam und umschdändlich, dasses emm vorkommd, als wär mer in Zeidfresserschelee eigmachd. Dess zerrd und ziehd an meinen Nervenendn. Brudål und unerbiddlich. Mehr wie alle Schmerzn zamm, wo ich weechn dem dreggs Bruch ghabbd habb. Hörd sich wie a dumms Gebabbl a? Isses awer ned.
Der Börnie hadd enn schönne Vergleich ghabbd. Der Gerd, wenn der wiss würd, dass der Missd vorbei wär, wenner mehr Gewichd heb könnd, wie der Steiners Matthias, nacherd würd der so lang dränier, bis des klabb däd. Un da hadder im Brinzibb rechd, a wenn ich mich edz nadürlich ned mid em ehemålichn Weldmeisder vergleich däd. Blos dummerweise liechd all des nimmer in menner Hand. Ich muss wardd. Eefach wardd. Und während dem ganzn gewardd a noch damid leeb, dass alles, was ich mach unendlich langsam, umschdändlich und damid wenich befriedichnd is. Glebbds mer, des is meine ganz brivåde Hölle.

Wenn ich jemåls a Bröggle Verschdändnis aufbring konnd, für Leud, wo Zeuch hamm du, wo mer vo ausn nedd seh kå, nacherd edz. Des wasmer vo ausn seh kå. Ganz am Afang des dodål unadürrliche gschdellde Gelengg, nacherd des Loch, wo se nei mei Verse gebohrd hamm. Dann der Fixadör mid denne vollgebludedn Verbänd. Und am End die eglich breide Narbe vo der ledzdn Obberazion. All des hadmer gsehn, brudål und drasdisch. Edz is des vo ausn ziemlich schö worrn. Awer die aggduelln Rönchnbildli sin hald immer noch ned wirglich besser. Ned wie am erschdn Dåch, sondern nach der ledzdn OB nadürlich. Ordendlich zammgefliggd mid jeder Menge Schraum, Drähd und Bladdn. Korrekt rekonsdruierd. Awer hald noch lang ned zammgwaxxn. Und ich kann des mid den Zammwaxx ned bschleunich. Ich brauch auf unbeschdimmde Zeid für jedn Blödsinn viel länger, wie ich des gwohnd bin und wie ich dess irchndwem zubillichn würd. Und ich brauch auf eemso unbeschdimmde Zeid bei dodål viel Zeuch Hilfe. Noch schlimmer. Ned genuch, dass ich mei eichene Leisdung ned abliefern kå, ich muss a noch Zeid vo annern abzieh. Wie a Barrasidd. So a dreggs Bludsaucher. A Schnaggn, wo mer druff haud unnern Går ausmachd. Ich schwörs, des is schwerer für mich, wie die Schmerzn und wie des, was mer seh kå.

Nacherd hab ich mein Blazz in der Lechion der Reserveheldn uffgebb – und zu denne Willäins nüberwexxl müss. Vom "Hammersbald" zur "Subberschnagge". Hörd sich går nedd so drammadisch a. Der machd doch sei Widzli und verzähld sei Gschichdli. Had sogår bein Gradis Rollnschbieldåch a halbwechs bersifflierendes Äkschn-Ahmdeuer draus gmachd. Und der kå a scho widder ganz schö viel. Des Bee schaud a nimmer schlimm aus. Alles halb so schlimm.

Tja. Mir fälld des jedn Dåch schwerer, mich selber zum moddiwier. Ich bin nach wie vor ned in der Låche, mich dadsächlich länger auf Zeuch zum konzendrier, was nedd hunderd Brozennd Konzendrazion erfordern dud. Zum Beschbiel Büchli les is nach wie vor echd schwer. Viel vou dem, was mir normål dodål liech dud, is gråd kä Obzion. Wenn ich åfang zum Lees, gehn mei Gedånggn auf Reise. Wenn ich versuch du eefach zum endspann, nacherd dengg ich sofford an all des Zeuch, was erledichd werrn müssd und was ich normalerweise scho längsd erledich hamm würd. Wie mid schdändich ågezochener Handbremse zum fåhr. Und dess machds nedd besser. Nacherd fehld zur körberlichn Befähichung a noch des Konzendrazionsvermöchn. Un vor allm a noch die Kreadiwidäd.

Nacherd is des für mich a echder Lichdbligg, dass erschdaunlicherweise unglaublich viel drodzdem glabb dud. Weechn dem Einsadz vo annern Leud, denen ich dafür echd danggbår bin. A wenn des arch schwer is, für jemand, wo sonsd als "Hammersbald" ziemlich ungnädich mid Leud umgehd, wo die Peiss ned hald könn und wo auf Schnaggn ohne Bedengn druffhau dud. Ah auf "Subberschnaggn".

Glebbds mer, so wizich sich des åhörd, für mich is des ned so eefach dranzumbleib. Awer edz hab ich heud amål versuchd, mich zurückzummeld. Desweechn is die fränggische Glosse heud a aweng adübbisch gworrn. Wobei ich sicher bin, dass ich edz scho weiß, wer mir da widerschbrech dud. "Wår doch eefach blos a dybbisches Gejammer vom Gerd".
Insofern zieh ich edz die Reißleine, hoff, dass ich däs vermiddln konnd, was ich wolld, du euch a schönnes Wochnend wünsch und sach wie immer: dschau, arrifidertschi, euer Gerd

Ihr könnt alle lieferbaren Artikel
im Webshop bestellen oder via e-mail im Laden anfragen

• Kategorie: Gerd solo , Mini Podcast , Sprecher Gerd , Vom Låden und vom Leben
• Keine Kommentare