hermkes romanboutique

Mir sin ja edz seid annerer ganzn Weile scho a a Bagedschobb. Des hässd, dass der Dübb, wo die Bagedli ausliefern dud, wenn er kenn dahämm åndrifd, die bei uns debonier kånn. Gwasi so wie früher, wie, wenn der Bosdler kenn androffe had, der an Zeddel neis Briefkästle gschmisse had, dass du dei Zeuch aufm Bosdamd abhol sollsd. In dere Zeid hamm mir a Beowachdung gemechd: Heud gibds ånschdadd dem Bosdbodn zusädzlich noch den vom Hermes, vom DBD, vom UBS, vom GLS un was wäss ich noch alles.
Also zahlnmäßich a Zunåhme.
Gleichzeidig is åwer a des Beschdellverhåldn vo die Leud egsbonenzial gwachse.
Also a gigandische Zunåhme.
Weil die Leud immer mehr dahämm rummhock du, kenne se sich a nimmer und dun a für ihr Nachbårn nix mehr annehm. Also bringt der Dübb vom Bågeddiensd a bei die Nachbarn nix mehr unner, was ihn dann a widder unner Zeiddruck bring dud bei seine üwer hunnerd Schdobbs.
Widder a Zunåhme, vom Schdress her.
Edz is åwer der Bosdler gar kä Bosdler mehr und scho gar kä Beåmder, sondern a Subundernehmer vom DHL oder a Zeidarbeider der wo für sein Dschobb viel zu wenich Geld griech dud.
Des is edz finanziell a Abnåhme.
Die Leud wolln alles immer schneller, warum die edz sogar über Drohnen bei der Lieferung nachdengg du. Da kommd nämlich der dodåle Druck von den Versendern (also hald denne große Gloubl Bläier), dass des Zeugs am besdn soford bein Kundn sei soll.
Zeidlich a Abnåhme.
Un weil des ganze so schnell geh muss un immer mehr Bäggli (zum Beischbiel) bei uns land du, müssen a immer mehr Leud sich aufn Wech mach um die Bäggli selber abzuhol, un damid genau des du, was se eichndlich ned du wolld, ihrn Schlåfblatz verlass. Die sin dann meisdns echd angfresse und dodål geschdressd.
Lebensgwålidäds-Abnåhme.
Wenn ihr mich edz fråchd, was mer daran ändern kou, nacherd is des dodål efach. Duds amål widder vo allens rauskomm. Besuchd euer lokåle Lädli mid Vorsadz, ihr werd erschdaund sei, wie nedd un freundlich so a Gschbräch sei kann. Werfd des Geld ned nein Rachn vo Konzerne, die wo Leud ausbeud un in Deudschland ned amål Schdeuern zahl du, sonnern unnerschdüdzd euern Nachbarschfdslådn. Vielleichd machd a in der ein oder annern Egge widder enner uff, wo der ledzde scho vor Jåhrn bleide gånge is. Nacherd könnd ihr widder um die Egge eekäff, der griechd sei Wår ordendlich gelieferd un es müssn ned hunnerd Dübbn die glenne Schdrässli verschdobf mid ihrnen Schbrindern un üwer hunnerd Einzelzuschdellungen rumschimpf. Bassd amål uff, vielleichd ned gleich – åwer nach ennerer Weil wird sich a Lächeln auf euerne Gesichder schleich un des is dann a Zunåhme – an Glück.

Endlich amål widder hammer so a Korrelazion (ne, had nix mid derre große Koalizion zum dun) zwischn die zwä Sach, die wo sei müss, dass ihr hier was zum les griech dud. Zum Enne hab ich zwischn all die ånnern Ardiggl, den (Weihnåchds)Gschäfdli im Lådn und Wardungsårbeidn an unnerer Seid amål widder a weng Lufd. Zum ånnern is hald amål widder enns von dene Ereichnissn eindrede, die wo mich dazu bring dun, a was zu Babier oder håld zur Dasdadur zum bring. Ich hab gråd a Delefonåd ghabd, des arch schö war. Rufd mich so a Dame aus Münchn an und frächd, ob mir noch den erschdn Asderix uff meefränggisch im Låde hamm. Edz isses ja so, dass die Büchli middlerweile vergriffn sin un bei Big Äi a ***geld kosd du. Deswechn såch ich ersdamål brinzibiell nöö. Ich bin ja ned die Wohlfård un du mei schönne Büchli an irchend so an Schlaumeier verschick, der wo die Breisli bei Big Äi genau kenn dud. Nacherd merk ich åwer, dass des a echd nedde Dame is, die wo des ned wäss, blos den Dibb griechd had, das mir a verschick du. Gud, des Ding had se gegrichd – un a noch die erschde Seide am Delefon vorglese, damid se a sicher sei kånn, dass des a der richdige is! Ich hab Schbass ghabd, die Dame a und a båa Kundn, die wo des midgriechd hamm a gleich noch – subber – so solls sei!

Nacherd war mer am Wochnend amål widder am Lago. Wie mer so am Sörfschob gesessn sin, hammer a båar Sachn erleb dürf, die wo echd unner die Kadegorie Big Bäng Siorie häddn fall könn. Die Morål von dere Gschichd had mich emål mehr zu dem Pungd gebrachd, dass des dodål wurschd is, wo du dei Brödli verdien dusd. Es gibd üwerall Frieks, die wo an Comicschdribb weerd wärrn. Deswechn an dieser Schdelle mei Aufruf: Wenn enner vo euch sich berufn fühld, zum Comicardisd, åwer kä richdiche Bladdform findn dud, nacherd würd ich scho gern middem zammarbeid. Ideen gäbs genuch, nur mål kann ich hald ned. So was ähnliches, wie die Glosse häd ich a gern in Comicform. Als webbcomic. Mit Cartuuns zum Demma Fäns un Kundn, Fäns aus der Schbieleszene, Comicfäns und Leud wo (um Blus Brassers zidier zu dürf), die wo beides lees du: Fändäsie und Seins Fikschen. Nix für ungud, åwer des Dema is einfach zu gud. Also melds euch, Vielleichd gehd ja was zamm.

Edz isses amål widder so weid. Urlaubszeid. Un ich bin widder amål der Ledzde. Des hessd, die ganze Zeid, wo die ånnern sich scho am Schdrand hamm flätz könn, hab ich buckl dürf. Nacherd du ich edz a echd scho a weng am Zahnfleisch kriech un bin des enne oder annere Mål a scho a weng ungnädich gwesn zunemm schwierichn Kundn. Ich merk des nacherd selsd ofdamål scho, bloss mesdns zu schbäd. Langer Rede kurzer Sinn, ich hädd gern so a Ård Generålabsoluzzion vo euch – nemmds mer bidde ned üwl. Dafür bin ich nacherd, wenn ich widder då bin, a echd riläxd un dadurch, dass ich der Ledzde bin, gibds a kenn Engbåss mehr. Deswechn sag ich edz arriwiderdschi un bis bald – in ålder Frische…

…nacherd wäss ich edz scho wieso: Weil ichs nimmer hör kann, dass mir die Bessdn sin, åwer des Inderned (messdens Big Äi) håld einfach billicher is un mir des verschdeh müssd. Ich wills går ned wiss! Behålds bein dir! Du mirs ned verzähl! Wenns du nix bein uns kauf dusd, nacherd komm a ned her und dus uns verzähl. Bleib dahämm in dein Keller, beschdell dei Bizza bein Lieferdiensd, dei Büchli im Inderned und lass dei Wäsch von was weiss ich wen wasch – awer du mir ned mei Zeid schdehl! Argh!

Dud mir leid Kinnersch, des haddamål sei müss. Ich måch euch alle echd gern und mir is a glår, dassder ned im Geld schwimm dud un a seh müssd, wiesder rümmkünnd. Un wenn amål was in Inderned dodål günsdich is, nacherd schlåchds zu. Blos dud ned mid mir deswech rumdiskudier. Wenn ich an Breis håld kann, nacherd mach ichs, awer drauflech gehd ned. A wenners ned glebbd, annere Sachn sin widder günsdicher wie im Neds. Und sich üwerall die Rosienle rausbick is am End für alle ruinös. A die "billichn" mid "20 Brozend auf alles außer mid Buchschdäbli drin" duds amål zerleech. Mir sin seid üwer dreissich Jåhr für euch da – un des immer wieder gern – weils die messdn vo euch a werd sin!

Dångg euch und dud mir leid, dass amål widder alle mein Zorn abgegriechd hamm, wechn a båar Debbe!

Ja, uns gehds scho gud. Is a subber Dschob innem Fändäsie Lådn zum schaff. A bissle Büchli verkäff un a bissle inner Sonne rummhock. "Ihr habds a Lebe, so a Lebe möchd ich a amål hamm." Rechd hadder, häddsd was gscheids gelerrnd!

Was ab un zu aweng an Schadde auf unner sonnigs Lebe wirfd, is die Dådsach, dass die Leud, wo mir unner Zeuch hergriech du ab un zu an echde Badscher hamm. Vorinds kam so a Lieferung, wo mer a weng drann verzweifel könnd. VVA Vereinichde Verlågs Auslieferung. A echder Gigånd. Gwasi enner von den Gloubl Bläiern. Die dun uns a Bäckli schick, mid em ennzichn Manga drin. Des enne Manga kossd im Verkauf sechs Euro fuffzich. Wiechd so viel, dasses logger für ennen Euro via Büchersendung hädd verschickd werrn könn, kosd uns åwer bisses im Lådn is siebn Euro fuffzich. Da kann ich in mein Dschobb so lang innerer Sonne rumliech könn, wies ihr wolld, wenn ich nacherd noch a Geld midbring muss, damids ihr euer Büchli kriechd, hab ich mer des echd verdiend!

Ich sach amål, dass des nadürlich zum Glück ned immer so is. 😉 Ab und zu du mir auch enn Euro fuffzich an was verdien!

Inner ledzdn Zeit wars alleweil a weng beschissn. Unner Schdrass is gschberrd worrn, der Wasserschådn war a ziemlich frusdrierend, weil mer hald nix hamm mach könn, nur wardn. Edz war heud morgn die Firma da, zum Feuchdichkeid messn und alles sieht gud aus. Mir müssn nix rausbaun. Dann hab ich kurz neis Inderned gschaud und gsehn, dass heud richdich guder Wind sein soll. Bernie had mir frei gehm. Ich neis Audo un annen See. Ersd war nix un mir ham scho gewidzeld, dass die vom Wedder hald amål widder gebfuschd ham, awer dann um 18 Uhr is der Wind doch noch kommen. Und mir ham zwei dodål geile Schdund aufm Wasser ghabd. Mir warn gwasi allends. Nur a ålder Freund und ich (a åld) un mir ham den See gerockd! Edz bin ich dodål ausgebauerd awer glücklich. Noch schöner, wie die zwä Schdund Wind war des Gfühl mid nen aldn Freund des zum deil. A wenns a weng off dobig is, ich mussd des verzähl. S Lebn kånn echd schö sei! Dangge Bernie für den schbondanen freien Nachmiddåch! Und dangge Willi fürs gemeinsame sörfn. Du hasds echd noch druff!

Brunzverreck, heud bin ich schö neigedabbd in die fürchderlich fränggische Falle. Kommd a Kundin nein Lådn, a echd nedde, awer hald noch so a jungs Ding, wo alleweil gern amål so Kuschlwambir-Büchli les dud. Die ham ja edz meisdns englische Diddl. Un des kann ein echd vor Broblemli schdell. Die Kundin suchd gar ned lang rum, sonnern frächd mich direkd. Un edz kümbds: "Habd ihr den zwäddn Deil von Datsch da?"

Radlosigkeid. Klickendes Räderwerk. Fieberhafdes Nachdenk. Was könnd die mein? "Tschuldichung, könnsd mer des amål buchschdabier?"

Sie widder: "Gloar. D – O – U – G – H – E – D glebb ich."

Ich: "Ahso. Also ned holländisch 2, sondern irchendwas mid Deig. Awer was?"

Gud ich gebs zu, dann wars gloar. "Touched 2" is hald für an Frånggn scho a weng schwer zum werbalisier!

Nix für ungud, gell!

Ab un zu gibds bei uns im Fernsehn Formade und oder Sendungen, die wo sozumsåch ausgediend hamm, oder an Offnbårungseid leisd müss. A guds Beischbiel in meine Aung is der sogenannde Grång Brie Deurowision. In dem Momend wo Lordie da abgeräumd hamm, had sich die ganze Sendung selber ad absurdum gführd ghabd. Gud, a Konsegwenz hads ned gehm un die Schdernle drällern als munder weider, aber eichndlich is des nur noch a Dodndanz. Wenn a Mäddlbänd mid Monsdermasgn gechn Schlaacherdussies innem Schlacherweddbewerb gwinnd, nacherd is des Konzebd ned nur nimmer daufrisch sonnern abgeriddn.

Des selbe is edz middn Formad Bolidigg-Dååk-Runde bassierd. Ned irchnd a schbezielle Sendung is üwern Acker, sondern des ganze Konzebbd. Wenn bein Brivådsender in sonerer Sendung Bolidigger gwasi gechn enn Räbber a noch gechneinander argumendier müss un aus dere Sendung a noch a Gewinnschou gemechd wird, nacherd is des a s a Ård Offnbårungseid. Bein Näxdn mal gibds dann a noch a Riälidisoub mid Boliddigern. Wie die Osborns oder die Holbeins dann die Schillies oder die Söders! Des soll dann Bolidigg wieder inderessånd mach. Ich wäss bloss ned für wen.

bosd sgribdum Ned schwer zum vorschdell, dass der Räbber abgsahnd had 😉

Ich du meisdns schimbf üwer Godd un die Weld. Im Besondern a üwer unner Wegwerfgsellschafd un den Wåhnsinn, dass immer neuer Dreck ångschaffd wird, der wo gråd amål zwä drei Monad üwer die Garandiezeid hald dud. Was den meisdn Leud eh wurschd is, weil dere libidinöses Verhäldnis zum Neukäff ned amål die Garandiezeid benödichd. Wässd scho, jeds Jåar an neue Blasmadiwi. Bei der Audomobilindusdrie wird uns sogår von Schdaadswechn gsachd, dasses wichdich is, schbädesdens alle drei Jåar a neues zum käff. Das des der dodale Wahnsinn is, weil der Brodugzionsaufwand in dere Rechnung üwerhaubd ned drin is, kann sich jeder an zwä Finger abzähl, Mach du mers drodzdem.

Ich fåar a ålde Gurke. Ich mach die, a wenn der ålde T3 Bus scho 380.000 km druff had. Edz wår mei Ålasser defeggd. Ich ruf mein Rebaradör an un du den fråch, ob der mir nen neun beschdell könnd. Auf mei Fråch hin meind er, dass ich mir endweder so en Fernosd-Nachbau im Inderned beschdell könnd, oder mein ålde Gragge rebarier lass. Dann hädd ich im Brinzieb wåhrdscheins a wesendlich bessere Haldbårkeid. Mach dud des so a glenner Lådn im Greinberchknodn. Ich dord hin, der des Ding am gleichn Dåch noch ferdichgemechd. Ich nei un abgehold un amnds noch neigebaud – Ich hab geglebbd, dass des ned wåar sein kann. Der Ålasser dud sein Diensd so gud, wie noch nie! GlÅar hädd ich mer für des selbe Geld a so an Zubehör-scheiss-mid-eingebaudn-ablaufdadum käff könn, so hab ich en glenne Bedrieb dahämm unnerschdüzd und des dodål guude Gefühl, dass des Deil edz besser is wie vorher. Nåchmachn!

Vorhin war a Kunde bei mir im Lådn un had mir verzähld, dass unne aufn Residenzblådz grad alles vorbereid wird für die 80 Jåhr Feier von der Bücherverbrennung. So had der des wirglich verzähld. Edz is bei mir nadürlich soford des Kobfkino ågange. Is des dann a Riinäggdmend? Soll mer da noch a båar Büchli vorbeibring, quasi als Sachschbende? Mir häddn da noch so a båar und wemma noch  a Schbendnquiddung griech würd, wärs fasd zum üwerlech.

Gud mei schnells Mundwerg war dann a aweng bös un mid dere gånze Disskussione, ob mer sein Schbass dreib dürf, mid dere Scheis Zeid vo uns Deudsche, hab ich mich gleich a weng umschau müss, ob da ned irchendwer des ghörd had un vielleichd nein falsche Hals griechd had. Mussd ja scho uffbass, dasde nacherd ned in irchnd so a Egge gschdelld wirsd.

Dabei solld mer meinermeinungnåch eher mal a weng drauf guck, dass mir vor lauder bolidigel Korregdness ned vergess, dass Sadiere un Bersiflåsche a legidiemes Middel is um sein Unmud auszumdrück. Glebbds mer, für die gånze Ald- un Neunadsis gibds nix schlimmeres, als wenn mer ihre hochheiliche Sache durchn Kakau ziehd. Vor lauder Bedroffnheid, was damåls gschenn is, dürf mer uff kenn Fall unnern Blick verlier, was heud so abgehd. Die Bücherverbrennung had was mid der Beschneidung von Freiheid und Kuldur zum dun ghabd und ohne dass ich des edz vergleich möchd, awer heud gibds genau dafür wesendlich subdilere Medodn.

Vielleichd isses a wirklich gude Agzion, die scheiß Gschichd, wo vor achzich Jahr glaufn is, neis Gehirn zurückzumbring, vorausgesedzd, bei der Dauerbedröhnung mid Werbebrobaganda un Riälidisoubs is noch genuch davon übrich!

Der Auslöser für die heudiche Glosse wirds wiss, awer er soll sich såch lass, dasser in dem Fall ned Ziel von mein Schbodd is, sonnern blos a Kadalüsaddor. Er had mich gwasi blos angschdifd zum rummeckern. Informazionszeidålder hessd für uns, dass mer all die Informaziönli, die wo mir ham a nochamål aufbereid müss um se dann wieder zur Verfüchung zum schdell. Bei uns uff die Seide schdell, wie zum Beischbiel Beschbrechungen, Dibbs, Drådsch und Kladsch. Also scho a weng a Zusadzårbett. Edz had åwer jeder in unnerer Indifiduålgesellschaft a ånnere Vorlieb, wie er gern sei Informaziönli hädd. Also des ganze nochamål als Niusledder. Mer solld menn, dass des für die Leud reich könnd, um von dahämm aus zum wiss, was sie wollerd, wennse scho nedd vorbeikomm wolle. Also könnd mer menn, dass die dann efåch kurz a mäil schick würd und ankündig würd, dasse des gern am nächsde Dåch abhol däd, am besdn scho zammgebaggd mid ferdicher Rechnung- weil Zeid hammse alle går nimmer. Leider weid gefehld. Da muss mer dann noch åruf un jeds einzelne Objegd der Begierde abfråch, obs a echd im Regål schdeh dud. Also å noch Delefonberådung – für was dun mir den ganzn Misd üwerhaubd boosdn. Am besdn im dodaln Drubl. Mir hamm ja sonsd nix zum dun. Und dann des ganze biddschö awer noch gelieferd, nei die Sanderau. Heud noch (gud immer noch besser, wie a halbs Jåar rumliech lass – scho reserfierd åwer ned bezåhld)! Des besde is, dasses dann noch so a baar Schbezialisde gibd, wo noch sach du: und baggd mer was schönns neus dazu, ihr kennd ja mein Geschmack. Ehrt mich zwår, awer wie zum Deufl soll ich mir von jedn Kundn alles merk, wenn ich’n scho fasd a Jåhr nimmer gsehn hab!

A wenn des Wördle Logisdig vo die åldn Griechn komm dud und λογιστική soviel heiss dud wie bragdisch ångewande Maddemadig, un an ähnlichn Wordschdamm had wie Logig, was a vom Griechischn λογική komm dud un dessen Bedeudung allgemein bekannd sein dürfd, ham des die Unnernehmen, wo sich des auf ihr Fähnli schreib du ned so richdich verinnerlichd. Un die Kundn a ned:D.

Mir sin ja edz seid anner ganzn Weile a a Bageedschob. Gud ned so nobl, wie a Bosdfiliale åwer ned unähnlich. Die Idee war, das mir eh scho immer die Bageedli vo unnerer gånzn Nachbårschafd angenomme ham, blos edz du mer a weng a Geld dafür griech. Als schönner Nebneffegd dun neue Leud nein Lådn komm un mir hamm gwasi a zusädzliche kosdnlose Bewerbung vo unnerm Lådn. Arbett isses a ned viel, also subber!

Ma dürf hald blos ned versuch des zum verschde, was sich die Leud so denk du. A weng had des dazu beigedråchn, dass ich mein Glaubn an unner Gesellschafd noch weider verlorn hab.

Da lässd sich wer Umzugskardongs schick. Im Inderned gekäfft, is dann ned dahämm, muss die bei uns im Lådn abhol, weil der Fahrer kenn angedroffn had. Dürf des ganze Bageed durch die halbe Schdadd kudschier, Un warum? Weils so efach is. Sicher viel besser wie nein Obi fahrn, dort die subvenzionierdn orchinål Obi Umzugskardons gleich neis Audo zum lad! Ihr glebbds ned, was die Menschn alles beschdell du. Dabeedn, ålde abgfåhrne Räffn, ganze Möbl und nadürlich a Bücher. Im ledzderen Fall isses nacherd besonders schö, wenn die dann ned dahämm sin, der Fahrer des Zeuch bei uns im Lådn ablåd dud, die nochamål durch die ganze Schdadd dibbl müss, um die nacherd innem Buchladn abhol zum könn, wo se eh a da had, oder bis zum nächsdn Dåch hätt hab könn.

Is hald bragdisch, von dahämm aus zum beschdell :D. Annersch wirds, wenn die Logisdigunnernehme kenn Schob mehr find könn, wo se ihr Zeuch abgebb könn, weils kenn mehr gibd.

Ich däd amål sach, mir sein ja ned blöd. Nur so als Behaubdung. Bei manche Kundn scheind åwer mei Selbsdverschdändnis ned gedeild zum werrn. Des sin nie die, wo eh rechlmäßich komm du, sonnern eichndlich immer die seldene Gäsd, wo menn du, dass mir midn Glammerbeudl gebuderd sin.

A kurze Erklärung vornweg: Mir ham ja a gewisse Erfahrung mid unnerm Andiquariåd. Unner Breisli sin immer fär gwesn und mir dun versuch, dass des a so bleibd. Üwer viele Jåhre war des mid denne Breisli rechd konsdand und eher beschaulich zum bedrachd. Jährliche Kadaloche ham ihr Daseinsberechdigung ghabd un warn a echder Anhåldsbungd. Edz, mid den Inderned had sich des dodål gewandeld. Hab ich ja scho a båarmal zum erklär versuchd. Manches werdiche wird billich und werdlos, weils ned im Fokus is. Kosd dann enn Send blus drei Euro Versånd. Ånnersch is des bei Zeuchs, wo die Leud gråd agduell aufm Skrien hamm du. Da mussd dann hald unverhäldnismäsich dief nei die Dåsche greif. Insgesammd isses eher deurer gworrn, åwer vorållem is hald die Scheer weider uffgange, wie im richdichn Lehm.

Mir wissn des! Also bidde seids ned so naiv oder dreisd und dud alle båar Jahr amål vorbeikomm un guck, ob mir noch genau die exdrem seldenen åldn Exemblåre von euerm geliebdn Vambierschbiel hamm, wo ihr die neue Edizion ned möch dud. Die Dinger kosdn a Heidngeld auf ibäi oder amadson-margedbläis. Und des du mir a wiss! Ne, die hamm mir a nimmer, und wenn, brauchds ihr a går ned zum hoff, dass mir so blöd sinn, dass die bei uns noch billich zum hamm sind! Falls doch, war garandierd scho a ånnerer Schlaumeier schneller wie ihr :(. Und bidde schbards euch die zwä  Sädz: Schö, dass es euch noch gibd. (ja, schön. Awer dess is garandierd ned dei Verdiensd, weil du hassd dich immer nur beråd lass un dann dei Schnäbble onlein gmåchd) Ich war scho so lang nimmer da (ja, ich wess nämmlich scho gar nimmer, wie du heiss dusd, obwohl ich schdundnlång graddis an dir rumberadn habb), edz wolld ich amål widder vorbeischau (nee, du hassd blos gedachd, dass du edz den Dregg, wo du auf ibäi a scheiß Geld zahl mussd, bei uns Debbe billich griech kannsd), ihr ward mei ledzde Hoffnung (arghhh).

Heud hab ich a Offnbårung ghabd. Wässd scho, so wie bein Anhålder die Dussi, wo die Andword rausgfunne had, auf die Fråche nach dem Sinn des Lebens, dem Universum un dem ganzn Resd. Ich geh, wie fast ålle Morchn nei die Bångg, um unner Umsädz hinzumbring. Iss amål widder so a leichd dechnophobe Bangångschdellde im middelreifn Ålder am Schalder un is dodål üwerforderd mid dem Verglär von dere elegdronische Unnerschrifd. Die Schlange wäxd und mid der Schlange a der Unmud. Als näxdes kommd noch so a Schbeziålfall und dann a noch so middlschwer verwirrdes Müdderle. Des dauerd… Edz sin se scho zu zwedd hinnerm Dresn un die Schlange wäxd weider. Kurz bevor ich exblodier du, driffd mich dann awer die Erleuchdung. Wenn die ledzdn ouldskulichn Angschdelldn von den Schaldern verschwundn sin un die Leud nur noch mid Indernedbänging un Videokonferenz berådn werrn, nacherd kammer blos hoff, dass a ålle verwirdn åldn Leud gschdorm sin und a ålle, die wo kenn Bock auf Audomådn hamm. Weil sonsd wirds bidder. In dem Sinn hab ich demüdich geward un mich dann schö bedanggd bei die nedde Mädli. Schö, dass ihr da seid. Mid viel Geduld und nedde Wördli.

Echd geil, in dem Fall ned der Geiz, sondern die Idee. Die Grönung is aus dem Mandëi a gånze Woch zum mach. Big Äi is hald efach zeidlos gud. Des Moddo is Fregwenzerhöhung. Wie wenn die bein Radiosender dauernd Gewinnschbiele mach du, wenn grad wieder die Gwodn ermiddld werrn. Hald die Leud bei dir, weil sie könndn ja was verbass, dann könne se scho nimmer wo annerschders bräsend sei und vielleichd dort was käff. Dahämmbleib duns eh scho, edz müssesse nur noch bermanend auf unnerer Seid bleib.

Wie soll a normals Gschäfdle gechn so an Mechanismus ankämbf? Wie soll a Videodeech exisdier, wenn ma alles daunloud kann. Wie soll a Kino die Leud zu sich bring, wenn die die ganze zeid bein Seibermandëi hock müss. Wie solle mir reagier?

Okäi, zugegebe, ich versuchs a. Euch zum zubabbln un immer was Indressands zum schreib, awer nein Lådn dun deswechn a ned mehr Leud komm. Na ja, vielleichd dud des midn webschobb besser werrn.

…des ålljährliche Weihnachds-Gehambl. In der Schdadd sin die Deggos scho a gånze Weil in die Schaufensderfrondn vo die Lädn un mir könne uns a amål a weng schbūd. Braggdisch is, das mir eh grad a X-Men Schaufensder hamm. Da is der Aufwand ned so groß um a X-Mas Fensder zum draus mach. Der Weihnachdsumsadz is bei uns dradizionell eh ned so gigandisch (schåd auch ;-)) und für mich is so a ållgemeins Konsummfesd a ned so viel werd, wie a bersonalisierdes. Will sång, dass mir a Gschengli für en Gebordsdåch bersönlicher und wichdicher is, als wie des ålle Jahre wieder aus die Finger gsauchde Verlechnheidsgefriggl für unnern Baum. Da gibds eh nur Schnabbs, Bralinne und nadürlich Elegdronigzeuchs. Vom Händi üwern Bluräibläier zum DäbbleddBC midn Åbfl druff.  Dess Jåhr wirds vielleichd a noch so a Kaindl Feier sein (oder Kindl, ich wäss es går ned? – had auf jedn Fall nix midn Grisdkindl zum dun!) …oder was ähnlichs. Mei ehrliche Meinung zu dem gånze Gråmbf is, dasses mir bersönlich dodål egål is, Haubdsach unner Umsadz is a weng besser, als wie im Resd vom Jåhr. Auf des gånze Wūling könnd ich gud verzichd. A weng a Ruh un Urlaub wär mir lieber in der schdaadn Zeid.

Samsdåch ledzde Woch. Ich will åfang mei Verschbreche einzumlös und du mir exdra noch den Samsdåchsdiensd neidrück. Damid mer a schönns Schbielründle zammgriech du. Wies dann åwer Samsdåch is, kommd ersd kee Sau und nacherd , wo endlich amål enner dagwesn wär, ausgerechned da war so a Gewusel, dass der sich går ned gedraud had, was zum såch – und mir grad in dem Momend a kenn Kobf dafür ghabd hamm, kenner am Disch gschdanne is und ke Kärdli rummgleche sin, weil hald im Vorfeld, wie scho erwähnd, nix zammgange is. Dumm gloffe. Edz bin ich hald kommendn Samsdåch annerweidich unnerwegs, also ned im Låde. Damid schdehd a ke Disch rum, weils wår ja ausgmåchd, dass der Disch schde dud, wenn ich im Låde bin. Edz hamm nadürlich scho dodål viel Leudli gfråchd, ob was wär. Nochamål dumm gloffe…

Ich könnd mer neis Ärschle beiss. Scho bein Zahle hab ichs gwussd. Un als ich dann schnell amål bei Amadson neigeguggd hab, hads sich beschdädigd. Scho gloar, warum der Dübb des Büchle dreimål gekäffd had. Had a ordndlichs Breisle drinnegschdanne für des vergriffene Werg. Dodal versagd. Ned nur dass der Dübb edz als Kleeundernehmer bei ibäi oder als Margedbläismän die Büchli neis Nedz schdelld, er hads a noch die Leudli, wos wirglich hädd brauch könn vor der Nase weggeschnabbd. Dobbeld blöd. So gehn hald die Breisli weider nauf und der Debb bin ich – und die ehrlichn Kundn…

…den ersdn heud mussd ich mir noch a weng aus die Finger saug. Åwer der zwedde kommd von Herzn. Ich hab heud an echd beschgissenen Dåch ghabd. Heud åmnd wolld mer einfach nur noch amål a weng Worhämmer Inväschn zock – wässd scho, weche dem Durnierle am Sundi. Und ansonsde wolld mer hald a weng was dring. Ja, ich gebs zu, ich du gern amål was dring, åmnds. Mei Kumbl wolld mer enn Wodga midbring, weil ich gernamål an Wodga O dringg du. Der gehd zur Danggschdelle und grichd kenn, weil er zu Fuss is. Ich glebbs ned. Es war vor 20,00 Uhr, also die Lådenöffnungszeidn können nix damid zum dun hamm. Wenner a Audo gehabbd hädd, hädder welchn gegrichd. Des is echde Realbolidig. A Audofahrer dürf an Wodga käff, zum zuschüdd, a normaler Dübb, wo ned nein Subbermargd geh will, ned. Ich glebb, vor mein Urlaub hab ich jemandd unrechd gedan. Die wahren Vollgasdebbe sidzn in Berlin!

Ich will ja nix sågn, åwer edz muss ich amål a weng rummjammern. Ihr kennd ja scho mei Lidanei mid denne Dåch, wo alles zammkomm dud. Gesdern war widder amål so enner. Kenn Umsadz, blos blöde Frång und dann nadürlich noch a båar echde Brüller. "Ich håb da was bein Amadson beschdelld und des hab ich åwer scho, duds ihr des nemm?" und "Ich hab da drei Büchli bein Amadson dodål günsdig gschosse. Edz fehld mir nur der ersde Deil und der is bei denne saudeuer. Habds ihr den noch da?" åwer n Vochl abgschossn had dann mei Kumbl, der wos gud gemennd had un mir, weil ich allendsd im Låde ghoggd hab, a båar Brödli vo drüwe vom Subbermargd ghold. Subber Angebod, edz ganz neu: Schönne belechde Brödli mid a weng Schnickschnack druff, so Salad und so. Nur Zwä Euro. Der Dreck war von Gesdern un noch gfrore! Des mussde dir amål auf der Zunge zergeh lass. Ich hab den Dregg dann ned gefresse und hab lieber gehungerd. Nüber geh und mich beschwer konnd ich ja ned, ich war ja allendsd – war vielleichd a besser so…

Gesdern hab ich middem Kumbl, wo für die Zeidung schaff dud üweren Ardiggl gred, an dem der gråd schreib dud. Üwer Vandalismus vo junge Leud an schönne Blädzli am Mee. Wo mer grill ko un a weng feier. Ganz im Gechndeil zu meiner eichene Erfahrung hadder gmennd, dass er ke Schbur had find könn. Gud, hab ich dengd, nåcherd hab ich håld bloß a boår Ausnahme erlebbd. Un mir hamm früher alleweil a an schönne Scheißdreck gmechd – hab ich dengd.

Långsam griech ich a weng Ångsd, dass des mid meiner Aura doch a weng schdimm dud. Hädd ich nur ned geunkd.

Heud früh komm ich nein Låde un irgnd so a boår Vollgåsdebbe ham unner Blümli üwer den gånze Gehweech verdeild. Ned nur so, wies scho öfder wår, a boår rausgrubfd und midgeh lass, sondern a Hoddndoddnlåcher hinnerlåsse. Bierfläschli, die Blummedöpf rümgedrahd als Sidzgelecheheid un den Inhald üwer die Lådefrond verdeild. Dångge ihr Debbe.

Wässd – sauf kann a jeder, åwer wemma so an Scheiß mechd, solld mer am nächsde Dåch komm un des in Ordnung bring. Ich bin geschbånnd!

Edz hammer a subbergude, schönne Woch ghabd. Middennem grönende Fesdli zum Schluss. Da sinse alle widder dagwese, die ganze liebe Leud vo unnerer Kundschafd. Alle hammse ihr Freud ghabd und zum Schluss hin warmer noch aweng zammeghoggd un ham jeder a Fläschle Bier leergmachd. Un in dem Bier muss was drinne gwese sein.

Am Mondåch – edz ned so mei Freund – normålerweis – war blödzlich unner gronisch unnerbelchdes Kondo bei dere Bank innererem udobisch gudn Saldo. Seh dud mer ja noch ned ålles, åwer der Schdand is ja scho zum sehn. Lass mer uns üwerasch…

Heud frü wars dann genau zum sehn. Uns had enner dreiahalb Dausend gschengd! Naja, ganz so wars nadürlich ned, awer schö warn die drei Fehlbuchungen scho! Mir als ehrliche Heud sin nadürlich gleich nüwergedabbeld und ham Bescheid gehm. Wie gewonne, so zerronne. S’kondo had sich auf jedn Fall gfreud üwer den kurzzeidichn Seechn.

Kee Gemegger, bloß a Dådsach – und a echd widzichs Gschichdle. Samsdåch, dodåles Gewusel, Bernie allendsd im Lådn. Rufd a nedde Dåme an und frächd, ob mei Vadder noch da wär, weil sie suchd was für an Freund von ihrm Sohn und der wüssd scho ganz genau, was der so les dud. Leichde Sgebsis – åwer die wird scho wiss, von wasse redd. Gesåchd gedan, kä zwä Schdund schbäder is die Dame im Lådn und dud nachm Hermke fräch – grichd gsachd, dasser hinne is und gehd zu em. Ohne Mäusle schbiel zum müss, griechd der Bernie des Geschbräch gleich mid und damid auch, dass die Dame nach US Comics fräch dud. Die sin edz går ned so des Fachgebied vo mein Vadder…

Långer Rede kurzer Sinn, es is scho arch widzich, wie lang der Schaddn vom Hermke alleweil so is. Mir ham den Lade scho 1996 üwernomme, des hessd, mir dun den scho länger mach, als wie er. Drodzdem is der Mann hald a Insdiduzion, sogar heud noch, wo der scho längsd im Ruheschdand is un nur noch ab und zu zu semm Vergnüche hier abhäng dud. Eichendlich echd scheniål, awer manchmål a aweng läsdich. In dem Fall ham mir alle arch lach müss üwer des schöne Annegdödli. Ich hoff, ihr finds a unnerhåldsam.

A langs Wochnend habbich ghabd. Endlich amål widder. Des hammer dann a dodal geil ausgenudzd. Und am Sundi Åmnd wolld mer dem Ganze dann noch a Grönli aufsetz. A schönns fränggisches Lokål – am besde mid Meefischli. Also mir auf der Rückfåhrd vonnem See a weng a Bräinschdorm gemechd, wo mer sowas noch find könnd. Des erschde wo mir eegfålle is had an Besidtzerwechsel ghabd und edz a dolle neue Schbeisekard ghabd, wo kemm von uns was gfalle had. Snächsde had an sonndächliche Ruhedåch – subber. Die ledzde Schongs war in Veidsbach direggd am Mee. Eichendlich a dibb dobb Blädzle. Hamm die Veidsbacher scho immer ganz nedd hiegrichd, ihr Bromenade. Mir also, scho a weng ausghungerd nei in den Låde. Nachdem mir a dreivirdl Schdund ham ward müss, vor eem Gedrängg, weil die Bedienung nur mid a boar Lokålprominenzien beschäfdichd war, kam dann ålles uffemål. Mei Saibling gleichzeidig mid derre Vorschbeis un so weider. Des Dreggdsfläsch wår dodal zäh, die Vorschbeis mäsich und der Salad had dodal gfehld. Mei Gemegger wurd gfissendlich üwerhörd und am End war quasi uff derre Rechnung des ennziche, was gschdimmd had, der Duribonus fürn schönne Ausblick. Verdammde Axd, des issa Schand, dass bei manche Frånggn des immer noch ned ankomme is, dass Schlamberei und Unfreundlichkeid noch lang kei Aushängeschild sin un dass für an Flähr a weng was gmechd werrn muss. So schö der a is, der Låde had michs ledzde Mål gsenn und bei uns wird des beschdimmd kä Dradizionslogål!

Dodal geil. Edz war ich a båar Dåch mid a båar Kumbl in die Berch Mobbed fåhrn. Enner had mir bei der Abfåhrd voll Schdolz sein Kindle gezeichd und verzähld, dasser ja so viel les dud un des führn Urlaub alleweil dodal braggdisch wär …grummel… ich hab nadürlich richdiche Büchli dabei ghabbd. Ned so viel und ned so glee verbaggd, åwer håld richdiche Büchli. Wer brauchd a scho zehn Romane für vier Dåch? Wurschd, er drüggd mir also des Ding voller Schdolz in die Händ, ich verkneif mir an Kommendår und gebbs em widder. …Am morchn nach der erschdn Nåchd, dud er mir verzähl, dass sich sei Bedriebssysdem verabschieded had und er nix had les könn. Ohne viel Geschbödd hab ich em dann mei Auswahl gezeichd und ihm a richdigs Büchle ausgeliehn. Damid war er dann a glücklich – und es had ihm a dodal ausgereichd für die båar Dåch. War a nedd größer, schöner zum Anfass und had fungzionierd :D. Ich glebb ja, dass dem sei Fehler war, mir des Ding nei die Hand zum drück. Ich glebb, des had die Aura vonnem Buchhändler ned üwerschdanne! Schö wars…

Ich glebbs ned. Verdammde Axd edz isses scho widder bassierd. Kennds ihr des? Ma glebbd, dasmer ålle Evendualidädn abgedeggd had, weil der Kunde echd komblizierd is un schonna barmål was dumm geloffe is – wässd scho, diesmal mach ich kenn Fehler, weil die Blösse will ich mer ja ned gebb… Und dann kümmder… und scho in dem Momend, wo er zur Dür neikommd, is dir gloar, da is noch irchendwas, wasde vergessn hasd. Du holsdm sei Bestellungen ausm Låcher vor un scho in der Zeid hadder drei Diddl gfunne, wo in sein Fächle häddn sei soll – awer ned drinn sin. Unner Sysdem is echd ganz schö ausgeglügld und ich versuch a noch möglichsd alles Relevande zum nodier, grad bei so schbezielle Kundn, aber grad bei denne glabbd dann hunnerdbrozendich irchendwas nedd. Brunzverreck, dass mer ned perfeggd sei kann, is mir scho gloar – awer dass des dann immer bei genau denne Leud bassier muss, wo mers am allerwengsdn gebrauch kann. Is wohl schlechdes Karma, oder wie des hässd.

Gestern simmer amål widder mid a båar Baddlbödli uffm ålde Mee vou Volki nach Summri gfårn. Des war dodal endschbannd un wunnerschö. Wessde mir dun alleweil immer lach üwer so Schrüchli wie "Da leben wo andere Urlaub machen", weil sichs ja a ganz schö blöd anhör dud. Awer im Brinzib is des går ned so unwåhr. Mir müsse manchmal går ned weid fahr um a schönnes Wochenend verbring zum könn. Kloar möchd ich ned allweil immer nur in unnerer Gechnd rumhäng und a amål die weide Weld seh, awer bevor ich mich nei so an Fliecher hock un middener Billchfluchgesellschafd a Wochenend uff Malle verbring du, du ich lieber unner schönne Ecke entdeck. Und glebbds mer, zum Radln, zum Bödli fåhr, zum wandern, kleddern, reidn oder was ihr hald grad so gern mechd, von mir aus a eefach nur am See rumhock – gibds hier mehr als genug zum dun. Um enn Gefålle möchd ich euch nur bidd. Nemmds euern Dreck wieder mid hämm un wenn sou a båar Sauglöüfl des ned mach du un ihr des midgriech dud, nacherd nemmdser hald denne ihrn Misd a noch mid hämm zun endsorch. Weil je mehr Volldebbe die schönne Eckli kenne un ihrn Mist dort hinnerlass du, desdo wenicher schönne Eckli wernns – endweder, weilse nimmer schö sin, oder weil a Verbodsschild hinkünnd.

Beschdimmd habd ihr des die ledzde Zeid midkrichd, dass ich ned gånz so viel Zeid neis Schreim von unner Glosse hab schdeck könn. Des liechd unner ånnerm an denn bereids mehrfach erwähnde Sach mid di Vormergerli fürs Hålbjoar, awer å aweng annerer grundsädzliche Gschichd. Ich wess ned, ob des euch å so geh dud, awer ich hab immer mehr des Gfühl, dass mir am End vonnerer Zeid noch ganz schö viel zum Dun üwer bleibd. ’s is går ned allzu lång her, da hab ich mid en ålde Kumbåne zamm immer so a Åard Karrikadur endwiggeld, üwer den glenne Schleun. Der glenne Schleun wår sozusåche a weng unner Lachnümmerli üwer die Leud, wo immer vonner Endschleunigung geredd hamm. Un der glenne Schleun war dann immer dodål ferdich innerer Egge ghockd un had hyberwendilierd, wenn irchendsoa Bredicher an faule Lenz gschom had. Dåmals fand ich des voll lusdich. Edz bin ich mir nimmer so sicher. Ich glebb ned dass ich efach åld wer du. Ich hab eher des Gfühl, dass mir ålle uns immer mehr abzabbl müss um auf en grüne Zweich zum komm. Des machd ke Freud, is awer obligadorisch …un des schdingd mir gewaldich. Wenn also enner vo euch a Idee had, wie mer aus derre Dredmüh rauskomm dud, nacherd soller sei Maul aufmach. Ich glebb bald, dess is wie mid derre Zwäavirzich.

Derzeid bin ich am durchgeh von die gånze Hålbjahres-Brosbegdli von den Verlåchn. Des is eh scho immer a Graus (desweche du i vielleichd a gråd in demm Momend aweng was ånnerschders newebei ;-)), weil du dich durch an derårdign Haufn von Diddeln durchkämbf mussd, dasses enner Sau grausd. Besser sin die jeweilichn Brosbegdli an ned worrn, üwer die ledzdn Jåhr, ich menn von der Formulierung her, was den Verkauf der jeweilichn Verlagsbrogramme fördern soll. Ganz besonders freu du ich mich awer in dem Jåhr üwer den Versuch, ålles a weng zum kadegorisier. Ich werd wåhnsinnich! Ich hab des scho in meiner Jugend (lång is her) gehassd, dass jeder Volldepp irchendwie gemennd had, dass er sei Musikrichdung neu benenn müss. Verdammde Axd reichd ned Meddl? Brauchds da a noch Bläck-Meddl, Brogressif-Meddl, Dess-Meddl, Weid-Meddl und so weider? Und edz gehd des in der Fandasdig a los! Und ålles soll was annersch sei! Ich werd verrüggd! Dark-Fändäsie, Örbn-Fändäsie, Hei-Fändäsie, Romändig-Fändäsie, Schdiem-Bank, Dark-Fiutscher-Ssriller und so weider – ich glebb unendlich. Im Bereich Seins-Figgschn isses a ned annersch. Un die gånzn außergewöhnlichn Diddel, wo mer früher als Vorzeigebüchli genomme hädd, werrn üwerhaubd nimmer als Fåndasdig bezeichned. Die sin hald dann einfach gude Bücher. Danggschö ihr Debbe!

Ledzdendlich simmer edz ålle widder vereind. Nåchdem mir scho a Verbrüderungsbesäufnis bei mein Lieblingsgriechn midgemachd ham un der sein Fussi-Frust mid lidderweis Uso had nunnersauf müss, wårn mir dann gesdern noch bei mein Lieblingsidaliener. Der wår ned so gefassd, wie sei griechisches Bendand. Brunzverreck wår der gelåde. Des kann doch efach ned wåhr sei, des is doch bloss a Schbiel. Ich hab ja scho gewussd, dass der bein Fussbåll kenn Schbass verschdeh dud, weil ich bei enn dengwürdign Schbiel zwädausnd Idålien-Frånggreich amål im Schbass, bei ihm inner Wirdschaffd, fürn falsche geblärrd hab, awer gesdern war der echd undrösdlich. Na ja, die Südländer sin da håld noch aweng gefühlsbedonder als wie mir Franggn. Oder vielleichd gild auch, dass je weider ma komm dud der Schmerz immer größer wern dud. Ich wesses ned, bin ja schließlich ke Filosof.

…wie des Dier vou di Idaliener sei Dörli gmechd håd und unner Buum wie die Korknäbli had schdeh lass. A weng a bår Bierli håds dann a gebrauchd um den Kummer runnerzumschbül. Åwer eichndlich wårmer hald die deudlich schlechdere Månnschaffd uffm Blådz, a wenn der Einsadz von unnerm Neuer fasd scho legendär war in denne ledzde drodziche Minude. Seis drum, gschenn is gschenn un üwer verschüddede Milch muss mer ned red. A wenn heud widder jeder der bessere Dräner gwese wär, wie der Jogi.

Ich sags ganz ehrlich, a wenns schåd gwese is, für unser Gschäfdli isses alleweil besser, wenn der Schbug edzerd rümm is. Babblig Viuuing war gesdern, edz wird widder gekäffd un gelese.

Etz håb ich amål widder a bår Dåch an der Dechnigg vo unnerer Seid rümgebåsdld un ned so viel gschriem, un gråd in derre Zeid wårn dodal viel Resbonds auf mei Glosse. Ich möchd mich bei euch dafür bedångg. Arch schö, was ihr so gschriem habd! Etz hab ich heud awer noch amål was ganz annerschders. Dangge an die Leud, wo mid für mich denk du, und mich immer wieder unermüdlich auf die Büchli aufmerksam mach du, wo mir durch die Labbe geh. Wenn nämlich so a Büchle bei an Verlag rauskomm dud, wo ned so auf mein Schirm is, nacherd kanns scho amål bassier, dass ich des går ned merk du. Zun Glück bin ich diesmål vo drei Seide druff aufmergsåm gemachd worrn. Ayn Rands schdriddigs Büchle "Atlas shrugged" is nach långem widder innerer deudschen Version zum hamm. Ich werd die Dåch nochamål ausführlicher drüwer schreib, weil "Der Streik" a durchaus indresands Dema is. Duds so lang amål nei die wikipedia neischau. Bassd zu mein ewiche rumbolemisier.

Des glenne Wördle Demagogie is enns von denne, wo im Lauf der Jahrhunderde a bår ganz schö hefdige Bedeudungswandel midmach hamm müss. Aber obs des edz im Momend eher bosidiv oder negadiv ausleg willsd, dud nix drann ändern, dasses immer um Beeinflussung geh dud. Im Brinnzibb is des dodål eefach. Då ko enner gud red un dann dud der uns verzähl, was mer dengg – solle. In ledzder Zeid könne die meisde in der Bolidigg leider nimmer gud red. Deshalb dun se sich behelf. Und zwår mid irchndwelche Schdadisdige und Ergebnisse, von irchndwelche Insdidudn oder Firmen. Die dun nämlich alles beweis. Un des schönne an dem Zeuchs is, dass es garandierd in jeder Schublåde zehn verschiedene solche Gudåchde gebb dud, mid denne ma beweis könnd, dass Godd exisdierd oder auch, dass ned. Subber dolles Beischbiel is, das noch vor a bår Jährli Dieselfahrzeuche brobagierd worrn sin, als Umweld-freundlich, mid dodal viel schdadisdische Beweisli. Un edz, wo se neue Konzebde hamm, is des ålles går nimmer wåhr. Ganz neue Beweise, dass des dodal schädlich is, had mer ja vorher ned wiss könn.

Wardeds nur ab. Bald duns uns beweis, wie der Dagless Ädäms gsachd had, dass "schwarz gleich weiß" is. Un dann viel Schbass aufm näxdn Zebraschdreifn 😉

Etz isses widder soweid. Fussballfiewer dud sich ausbreidn, unner Kundn machn sich rår und unner Bolidiger wolln schnell amål a bår Gesedzli verabschied. So wårs jednfalls angedachd. Dummerweise kann in dem Kinnergardn Kenner sei Klabbe håld und etz sin die enne widder beleidichde Leberwürschd un die ånnern müss nåchbessern. Hin und her wird rumgeziebfd. Jeder versuchd zum schachern und dud sich aufblusdern. Des ganze is mir höxd susbeggd. Da is beschdimmd noch was ånnersch im Busch. Glebbds mer, bis des Ganze durchn Bundesdåg gehd, is in des Bagedle noch irchendwas neigebåggd, was mir går ned merg soll und was uns a ned schmegg dud. Ich sach nur: Augen auf zur Fussballzeid, ned nur beim Babbligg Wiuing.

Und vergessds uns ned, mir sin nämlich wie immer für euch då, jedn Dåch vo neun bis neunzehn Uhr, im Låde un im Lebe 😉

Lezdn Freidåch hammer ma widdder die Blümmli vorn Låde neu gemechd. Säsonål angebassd sozusåche. Heud früh, wie ich aufschberr du, fällds mer glei uff. Da håd sich widder enner selber bediend. Jedesmål des gleiche Schbiel. Mir mache die Blümmli neu und am näxde Dåch hads enner schö gfunne. Auf diesem Weg: Du bisd a schönner, armselicher Depp! Falls de des liesd, und a båår äer hasd, nacherd schdexde se heud åmnd widder nei! Um die Ecke gibds an schönne glenne Låde, wos des Zeuch selber käff kannsd. Sowas muss einfach ned sei!

Gesdern Åmnd had mich a weng der Gaul griddn. Hab a weng rummotz müss. Nix für ungud, es dud mir a a weng leid.

Damid ich des widder gudmach du, hab ich a schönne Gschichd:

Bordo schdadd Babelfisch (Anhalter, Douglas Adams 😉 hier gehts zum Wikipediaeintrag)

Kommd a Frångge, im Urlaub, zu en, der wo dord lem dud, nämlich en Frånzos in Frånggreich. Obwohl mer ezd menn könnd, dass Frånggreich un Frångge was midnanner zum dun had, ham die ke Word vonanner verschdandn. Åwer nach a bår Fläschli Gudn rodn Bordo ham die zwä dodal mideinanner rumgeblödld, sich Witzli verzähld un sogar a weng filosofierd, des glebbsd ned! Den gånze Åmnd ging des so un zum End hin war der besåchde Frångge auf am Disch druff gschdanne un had die ganze Wirdschffd mid sei Widzli unnerhålde. Wie se sich zum Schluss verabschiedet ham had der Frånzos noch gsachd, dass mer går ned glaub könnd, dass er aus Deudschland komm würd. Ned weil se sich so gud unnerhålde hamm, sondern weil er so viel gelachd hädd (!der Frångge!), un des dun die Deudsche doch ned.

Leider war am nächsde Dåch die Wirkung vo dem Bordo widder vorbei un die Kommuniggazion mid den Abodecher, weche dem Asbirin, is bei weidn ned so elogwend Verlaufe. Is håld wie midn Babel Fisch. Wenn der ausm Ohr widder drause is, verschdesd a ke Word mehr…

Ich wäss manchsmal echd ned so genau, warümm mir den gånze Aufwand bedreib du. Mir schreim uns die Finger wund, zabbeln uns n Årsch ab un dann gibds bei denne meisde Ardigel fast kee oder går kee Kommendåre. Habds ihr eichendlich a nur im geringsde a Åhnung, was dere ganze Dreck füran Aufwand mechd? Wieviel Schdunde mir Åmnds noch ned wirklich dahämm sin, sondern üwerlech un schreib un mach du? Ich glebbs ned. Raus midder Schbråch! Gebds uns a gscheids Fiedbäck un mir sinn zufriede. Wenn mir ånner, wo kwasi im Exil leb dud, im Schwobeländle, ålleweil amål sachd, dass mei fränggische Glosse auf unner Seid a echde Freud is, nacherd is des scho widder Schbrid für a bår Killomeder, kwasi zum aufraff, widder was zun schreim. Was ich eichendlich såch will, is, dass mir nur wachs könn, mid euch zusamme. Schreibds Kommendåre, machds Vorschläch un helfds mid! Wär doch gelachd, wemmer ned a glenns Bollwerch geche die ållgegewärdiche global Bläiers daschdell könnd. rechionål hald.

…sondern was neddes. Had ja eichendlich ned wirklich was hier zum suchn un desweche hab ich a lang rumüwerlechd, åwer ez musses raus.

Ich bin ja gråd im Urlaub gwesn, bei denne Dürgn. Der Dürge is ja ez sozusåche des Bindeglieg zwischen Euroba unnem islamisdische Schurgenschdåd. Bei uns vom Ansehn her knabb üwerem Asülandn, ofd aweng beängsdigend inner Disgodeech, vor allem im Rudel, in jedem Fall åwer höxd susbeggd: Frauenfeindlich, exblosiev und schnell amål midn Messer zur Hand.

Ez in sein Heimådland is des vei a weng ånnersch. Blödzlich sin die Bürschli dodal freundlich! Des glebbsd vei ned, bei denn is aufgräumd, orndlich un echd schö. Die meisde Leud könne sogar ganz gud Deudsch, un mid die ånnern gehds a irchendwie mid Händ un Füß. Des Esse is so wie bei uns früher. Die ham noch so Zeugs wie Schniggerli und Kuddeln innere ganz normåle Wirdschafd. Liebe Leud sin des. Dodal Gasdfreundlich un offe. Mir ham a derard Nedde Bleibe ghabd mid richdig liebe Leud, dass mir går nimmer hämm gwolld ham.

Des schlimme is, dass dene da unne ez gråd aweng des selbe blühd, wie denne Idaliener in die Siebzicher. Da komme ez schdinkreiche Bazis aus der Schdadd mid an Haufe Monede, die Hälfd davon schwarz, un dun des gånze schönne Land vo die Fischer zammkäff, um ihr Luxusville hinschdell zu könn. Mid brivåde Jachdhåfe, bis neis Nadurschudzgebied. Des gibd nadürlich an Haufe böses Blud un ich will a går ned wiss, wie des schönne Schdädle in a bår Jåhr ausseh dud.

Drodz dem gånze Ärcher ham mir kei böses Word ned ghörd un sin dodal umsorchd worrn, wie früher bei der Omma. Liebe, eefåche Leud, ohne Duri-Allüre, trodz denne Durbokabidalisde aus der Schdadd. Ich hab mir fesd vorgnomme, wenn ich den näxde Dürg bei uns seh du, aweng wenicher Vorurdeilsbehafded an die Sach ranzugeh. Vielleichd sinn a die bei uns ned so wie mir denk du. Vielleichd sin die bloss ned gwöhnd so fränggisch behandld zu werrn, un brauch a weng a nedds Word. Servus kann ich ja ez auf Dürgisch. Vielleichd isses a Ånfang.

Büngdlich am Mondåch nåch unnerm große Ivend bin ich widder im Lånd. Widder nein Låde neigeh, widder a weng mid die Kundn dråtsch un mich so långsam widder agglimaddisier. Is a widder schö.

Schö isses an derre Stell a amål såch zu könn, dasses echt gud is, wie mei Jungs den Låde in derre Zeit un vorållem am Gradis Comic Dåch gschmisse hamm. Dångge an derre Stell für euern Einsatz, dass ich in Ruh mein Urlaub hab mach könn. Bei mir wars nadürlich a schö und ich bin jedz a widder schö erhold um mein Deil dazu beizudråch, dass des Gånze weiderläffd!

Gesdern wår widder der Jauch mid seiner Runde dran. Da ham se rechd bladd rumdiskudierd über die Måchenschafden vom Aldi. In dere Runde wårn ållerlei illusdre Köpf. Gred worrn is viel, gsachd worrn fasd nix. Auf der enne Seid isses ja dodal gud, wenn in unnerer Weld a bår Worde über Ausbeudung von Angeschdellde und über die Strukdur und Funkdionalidäd von so am allgemeine Wohldäder wie dem Aldi gered wird. Allerlei Bladidüde un Binseweisheide sin verkünd worrn, kenner had dem Ånnern zughörd, jeder had versuchd sei Barole möglichsd laud zu verkünd und deilweis a noch sei Brodukd zu verkäff. Was dabei dodal unnergange is, is die Dadsach, dass ned die Herren – oder der verbliebene Herr – Aldi des Broblem darschdell. Des Broblem is des Süsdem, un bevor mir ned die kombledde Funktionalidäd hinnerfrach, wermer går nix lös.

Mir sin innerer kombledd verzahnde Süsdemadigg gfånge. Un mir müsse neue Wege beschreid. Ich bin ned der Richdige un ned schlau genuch um die Wege zu find, åwer dasses so is, kann ich euch hunnerdbrozendich såch. Mir brauche uns ned hinschdell un midm Finger auf wen deut, wemmer uns ke grundsädzliche Gedanke mach dun, über des Gesammde.

Vielleichd sollde sich die Biråde umbenenn in Bardisåne – sich ned nur die ganze Gschichd mid den Inderned auf die Fahne schreib, sondern die gånzn Zuständ, die wo amål vonanner gedröseld kör.

Vielleichd wår des eh scho glår. Euch zumindesd. Mir ned. Dass ich in sonnerer Woch, die mid soan Mondåch angfångd had, wie die Derzeidige es gedan had, a ned viel besser üwer die ånnern Dåch red würd. Ich glebb, ich hab am Mondåch noch irchend so was gschriebe, wie dass der Freidåch oder der Samsdåch viel schönner sin als wie der Mondåch. Des war gladd amål a dodale Fehleinschädzung. In derre Woch war e Dåch so beschissen wie der ånnere. Un der Freidåch sedzd dem Ganze sozusachen noch a Krönle auf.

Schön, dass ich wenigsdns die Gewissheid hab, dass der Dåch ned für ålle so is, wie für mich. An dieser Stelle viele Grüße annen Gardasee runner. Ja, ich hab des Wedder gsehn und ja, fast ganz ohne Neid – sauviel Schbass! Vielleichd kommd ja irchendwan amål widder der Dåch, wo ich a freis Wochenend hab und des Wedder ned gleich widder en indischn Monsun oder en sibirischen Schbädwinder imidier dud. Häng luhs! (Des is Sörferschargong, damid ihr ånnern a wissd, warum ich so angfresse bin…)

Euer Gerd

An soanemm Mondåch sieht die Woche noch ganz ånnersch aus wie annem Freidåch oder Samsdåch. Uff der enne Seid hasd an Kick vom Wochenend krichd und mennsd, du könnsd was reiss, uff der ånnern Seid hasd a noch die gånze Woch vor dir und wessd ned, was auf dich zukünnd. Da kommds dann ganz schö drauf an, wies läffd. Dummerweis gibds den Garfield-Fagdor. Un der sorchd dafür, dass annem Mondåch die Erwardungshaldung eher unnerschridde wird, åls überdroffe. Jedenfalls, wemma davon ausgeh dud, das mer eher bosidiv eingschdelld wår.

Sagzemend nochamål, als erschds schbringd des Mobbed ned an. Badderie. Dabei häddsde noch a baar Såch zu erledichn ghabd. Also ausbaun, lådn, gschwind noch a baar Gleinichkeide gemachd un dann ab nein Låde. Was dann da rumschdehd sin vier Bånanekisdn vonnam Kunde, der wo gmennd had, dasser amål had ausmisd müss. So siehds a aus. Den gånze Misd hädder lieber zum Fischer nach Hätzfeld bring soll. Die sind da Åldbabier-Endsorgungs-Broffies. Dummerweis kamma des ja ned so deudlich såch. Also schö diblomadisch verhald. Außerdem hads da annoch zwä Bagedli vonerrer Verlågsauslieferung. Hammer scho drauf geward. Nur leider isses ersd die erschde Hälfde von der Lieferung. Ohne Rechnung und noch zwä Diddel dabei, die ich eindeudich ned beschdelld hab. Subber Dåch. Jedzd scho!

Ich wünsch euch an schönneren Wochnåfang als mir! Nur ned unnergriech lass, von soam Mondåch.

Euer Gerd

Gesdern war amål widder a arch schöner Dåch. Gestern wars wie früher. Des soll jedzd ned melankolisch oder åld geworn kling sondern dodål bosidiv. Gestern håmmer alle Leudli von unnerer Besadzung im Lådn ghabd und für jeden war mehr als genug zum schaff da. Gigandische Lieferungen, gleichzeidig Sysdemabdëid von dere Seide und Bürodåch mid Schdeuerkråm. Also sozusåchn dodal zugeschissn mid Verwåldung. Aufn erschde Blick a Scheißdåch, wärn da ned a noch die Kundn gwesn. Mir haddn nämlich a noch a ungewöhnlich hohe Kundnfregwenz. Un wie des immer so is, gehd eim dann ålles a weng leichder von der Hand. Die Gschbrächli dun sich verselbsdschdändich, ein Kunde gibd an Båll annen ånnern weider un es is die ganze Zeid a ångenehm freundliche Dradschschdimmung im Låde. Durch die Gschbrächli wern die Kund dann a audomadisch undereinanner befruchded. Enns kommd zum ånnern unds bassd håld irchendwie. Åmnds bisd rechdschaffe müd, åwer gud gelaund.

Obwohl mir nadürlich unnern Låde lieb un des gånze Drumrum a gern mach, isses hald ennfach schöner, wenn am End vom Dåch neben der Erschöbfung a noch a weng was hängegebliebe is. Un däs warn gesdern zwä Såchn. A weng a Geld in dere Kåsse un a weng a guds Gfühl, weche den ganze nedde Leud. Un beides sin unnere wichdigsde Åndriebsfedern, damid mir a am nächsde Dåch widder in ålder Frische für euch då sein könn. Danke, dass ihr da seid!

Euer Gerd

Habds ihr am Sundi den neusde Dadord aus Berlin gsehn? Da håddmer amål widder a schönnes Dhema. Ned die Haubdschdorry, sondern sozuåche der Hinnergrund. Da war amål schö schdimmungsvoll a Bild vo unnerer heudichn Gessellschafd gezeichned. Des Schderbn von die glenne Gschäfdli un des Bihävier vo die Bänker. Enne Läidie vo sonnerer Bank had aweng versuchd en moderne Robin Hood zu schbiel. Åwer des glabbd in unnerer heudichn Zeid hald a nimmer so rechd. Ålles is überwachd, un früher oder schbäder fliechd des dann håld auf. Zum Schluss war dann an dere Schdelle von der Lieblingskneibe von dem enne Kommissår a Schildli: "Hier eröffnet in Kürze in Matratzenlager". Arch bassend un aweng draurich. Ich hoff amål, uns bleibd des erschbard, weil ihr uns schö fleissig besuch dud. In dem Sinne, auf die nächsden dreissig Jåhr!

Heud håddmer ma widder so an wirklich subberåldn Gudschein in der Hånd. Kommd der Kunde un bezåhld mid son Drumm, was mir bis maximål zwädausndzwä oder -drei ausgschdelld ham. Sågd der im isses beinlich. Såg ich, des muss dir går ned beinlich sei. Wenn mir von alle unsere Kundn so Gudschein unnerwegs häddn, wär des für uns a echde Endlåsdung. In Wirklichkeid isses doch so, dass mir meisdens in Vorleisdung geh müss. Mir beschdelln die Wår un müss rechd zeidnah bezåhl. Der Kunde lässd sich des Zeugs weglech, lässds liechn bis zum Sangd Nimmerleinsdåch oder vielleichd noch anschreib. Drann verdien dud alleweil in ersder Linie unner anfrendli neibårhud bank-man, weil der an unnerm Disbo so richdich zulang kånn.

Wemma des Ganze umdreh dud, also du unnern Gudschein a bår Jährli bunkersd ham mir den Selbe Vordeil, wie die Große, zum Beischbiel unner Delekomm, mid denn Delefonkadde, die endweder schbäd oder går ned eingelösd worde sind. Vielleichd sollde mir unner Gudschen zu em Sammelobjegd hochschdilisier. Å bessere Möchlichkeid für Kredidbeschaffung gibds går ned. Also, wenner uns was guds du wolld, nacherd schenkder alle Leud a bår Gudscheinli un zwår bevorzuchd denne, wo går ned so arch inderresierd sin. Ich glebb, da komm ich die Dåch nochamål drauf zurück. Hörd sich nachener gudn Idee an, damid mir in dere Zeidn doch noch lang euer frendlie neibårhud comicdieler bleib könn!

Es gibd bei uns im Låden so a inderne Hidliste mit Fråchen von Kundn, die widzich, befremdlich oder einfach nur åweng blöd sin. Dabei gibds nadürlich so Sachn wie "Wieviel Brozend vo eure Bücher sin eichendlich gud?".

Die ånnere dübbische Kadegorie is "Ich hädd gern a Buch von dem – du wässd scho – mit dem- ich komm grad ned drauf – wo so weng phandasdisch is" un noch unendlich viel mehr Fråchen, die eichendlich kä Mensch beandword kann, außer em Telebad. Überraschenderweis komme mir uff die mäsde Andworde. "Ich hab da mal a Buch gelese, da kommd a Roboder vor. Und jedzd hädd ich gern den zwädde Deil!"

Åwer die eindeudich besde Fråch auf dere Hidlisd is eindeudich "Håbd ihr eichndlich a richdige Bücher?". Da fälld dir nix mer ein. Kloar ham mir "richdige Bücher"! Mir sin schlieslich å Buchhandlung un sogar å Ausbildungsbedrieb! Mir könne dir (fasd) jedes Buch von enne Dåch uffn ånnern besorch! Mir liefern dirs, wennde willsd a hämm! Mir verdiene unner Brödli damid!

Wässde, da gibds Dåch, an denne bassierd frühs üwerhaubd nix. Da hocksd du im Låde un wardesd auf die Kundn. Då gibds nix zum ausback un nix zum sordier. Da dusd du dann hald åweng saug und budz un ward… Und dann gibds wider Dåch, da hasd du scho früh en Sack voll Årwed vom ledzde Dåch midgenomme, un dann bassierds: Der Stift is krank, der DPD Fahrer, der normalerweis immer erschd Nåchmiddags kommt, stobft dich mit zehn Pakedli voll, der Kaffe is leer und so langsam macht sich Unmud breid. Und dann kommd der Ånruf, auf den de scho den ganzen Morgen geward hadsd.

"Hallo Gerd, ich wollte nur mal sehen, ob du im Laden bist. Ich hätte ein paar Bücher zurückzugeben, weil meine Freundin hat mir die englische Version im Internet besorgt."

Okay, is ja ned so, dass mir kei englische Versionen besorch könnd. Macht ja nix. Der käffd sonsd a öbess zam. Vielleicht nimmd er ja wieder was ånnersch mit! Zehn Minude späder isser scho wieder da… gwesen, also quasi scho wieder weg. Gfråchd hat er nach viel, gekäffd hat er nix, obwohl ålles da gwesn wär.

Take youre money and run.

Dangschön

So nacherd isses amål so weid. Ich gleb, des is scho fast genauso lang her wie unner Idee mid dere Seide, dass mir vo Zeid zu Zeid aweng a bar Gschichdli, die uns aufm Herzen liech du, verzähl woll. Un weil mir alle uns als Frångn sehn und des Gånze ja oft auch a bar Annekdödli aus unnerm Låde sein soll, wern mir des a so schreib. Wenn ihr des ned versteh könnt, nacherd müssd ihr hald amål vorbeikömm un uns bersönlich fråch.

Der Ånfang is a bei uns in Frånge net wirklich leichd. Mir dun uns zwar alleweil leicht im Babbeln, a manchmål nach dem Moddo ersd wird geredd und dann des Oberstübli eingschald, aber wenns dann hard uf hard kommd un mir vorre der Meud schdeh du, nacherd is des Müdle schö runnergekühld. Un bei denne zwä Sätz werd ichs für heud a belass un a går net groß was ånnersch schreib. Die Glosse soll kurz bleib. Kä großes Geschwätz, sondern nur a bar boindierde glenne Zeilen. Muss ja ned sei, das mer des ganze Pulver auf emål verschieß. Bis denn, machds gud

Euer Gerd