hermkes romanboutique

von Gerdam 13. September 2024

Podcast: Play in new window | Download (Duration: 6:46 — 9.9MB)

Subscribe: RSS | More

Vom Låden und vom Leben Nummer 30 – Ka I?

(…wie immer zum hören und mitlesen oder lesen und mithören, ganz wie ihr wollt)

Vom Låden und vom Leben
(audiofile #30: KI)

Habdser was gemerggd?

mir sin edzad ålle ganz schö brav und nedd gwesn. Zeid, amål widder annersch zum redd. Drodzdem såch ich erschdamål servus ihr Liehm dord drausn. Wie immer, wenn ich fränggln du, gibbds den Dexd zum midlees auf unnerer Seidn. Dess is edz scho a ganze Weile Draddizion. So wie a annere Sachn.

Wenn ich rechd drüwer nachdengg, gibbds in unnern Boddgaasd a ganze Menge vou Draddizionen. Is ab un an a weng anschdrengend, wemma sich ede Woche was aus die Finger sauch muss. Awer ganz echd, es machd a a Fazzngaudi. Mir daugn middlerweile ned blos mei "normåle" Folchn, sonnern a die, wo der Börn sei Blauderegge eddablierd hadd. Und ganz ehrlich a unner Gschichdli, wo ich mid menner Fraa eilees du, machn Schbass und dun mir immer rechd leichd vo der Hand geh.

Blöderweise gibbds a annere Dradizionen. Des sin awer welche, wo mir ned beeifluss könn. Zum Beischbiel die Draddizion, dasmer im Buchhandel allerweil zwä mål im Jåhr des Brogramm beschdell muss. Dass des middlerweile kä Freud mehr is, hab ich scho mehr wie emmål verzähld. Und glebbds mer, es wird ned besser. Weder dechnisch, wo ich ja echd noch Hoffnung ghabbd hab, noch vo der Schdruggdur her. Also der Börn hadds bei vieln Verlåchn noch ganz eefach. Die dun die Comix nämmlich wirgli noch als Schonre behandln. Nacherd is in so emm Brosbeggd a eichndlich alles wichdich. Is hald a Gewerch, die nacherd durchzumgeh, awer wenichsdns konsisdend. Bei di Büchli isses a Graus. Da gibbds nach wie vor kennen vou die grossn Verlåch, wo des Schonre sich draud druffzummschreib. Awer is ja a ålder Huud. Is hald so und dud sich wohl nimmer ändern. Wär hald schö…

Zum Glück gibbds ja noch a boar glenne, neue ambizionierde Verlächli, wo sich auf unner Schonre eigschossn hamm. Immerhin a Vordeil. Awer drodzdem isses hald immer widder so, dass mir jede Menge Büchli durchfall du. Also drodz echd konzendrierder und genauer Suche durch die Labbn geh dud.

Und dann kommds ihr neis Schbiel. Wennsder so an Fund habb dud, nacherd solldedsder mir des so schnell wie möchlich middeil. Also an guudn Diddl, wo mir durch die Labbn gangn is. A da is widder des A un des O die Kommuniggazion. Ich will da edz a goar ned meggern. Bei a boar vo euch dud des brima fungzionier. Echd aufrichdichn Dangg dafür. Awer insgsammd is des mid derre Kommuniggazion so a Sach. Dafür müssd mer hald a öffder im Lådn sei. Und echd, dess is a Graus. Ich jammer nedd. Ich du a ned schänd. Ich dus blos nedd verschdee. Wie hadd des bloos sei gekönnd, dass sich innerer so kurzn Zeid, die Gewohnheidn vo die Leud derårdich veränderd hamm?

Wieso hamm die mässdn eefach kenn Bogg mehr, innen Lådn zum geh und zum draadsch? Liechd des da drann, dassder kei Zeid mehr habbd? Weildsder von analooch auf diggidål umgschdelld habbd?

Also ich habb neulich so enn echd widzichn Kommendoar gsenn. Zur künsdlichn Indelligenz. Da hadd enner gschriem, daas die KI dafür gedachd wår, uns die Arbett abzumnemm. Also Budzn, Sauchn, Abwasch und so weider, damidd mir mehr Zeid hamm, für die schönen Sachn im Lehm. Måln, schreib und so weider. Greadief ehm. Edz isses awer so, dass die KI die Bildli mal dud und Gschichdn schreim. Damid mir mehr Zeid fürn Abwasch und fürs budzn hamm.

Fand ich echd gud. Und erschd a a weng widzich. Aber nacherd hab ich a weng drüwer nåchdachd. Mir hamm edz scho unglaublich viele elegdrohnische Hilfn. Im Lådn, a dahämm und wo weiß ich noch. Awer Arbett isses ned wenicher worrn. Dud uns der ganze Missd wirglich helf? Is dess echd e Erleichderung, wenn mei Audo alles kå? Oder verbringgd des nacherd blos mehr Freizeid bein Händler, inner Wergschdadd? Und ich du mei Zeid damidd verbring, die Gebrauchsanweisung halbwegs zum verschde? Bin ich echd zu blöd? zu åld? oder hilfd uns der ganze Missd kenn Deud. Eichndlich hilfd der blos die richdich großn. Nämmlich dabei, uns noch mehr vo dem Missd aufzumschwädz und unner glenne Lädli auszumschderm lass.

Also ehrlich ich glebb dass die ganze Umschdellung vo analooch auf digidål kemm vo uns echd helf dud. Zumindesd ned bein Zeidschbår.

Edz dun widder anner såch, dess is hald so a Üwergangsfase. Wenn des erschdamål alles läffd, nacherd gheds uns alln gud.

Glebb ich ned. Bisher is nix besser worrn. A wenn ich manches måch. Im Geechndeil. Mir dun jede Menge Sachn uffgebb, wo scho guud wårn! Solang drann rumverbesserd, bisses schlechder, uffwändicher, wenicher öggologisch, wenicher öggonomisch und a noch hunnerd mål so deuer is.

Mir falln jede Menge Beischbiele ein, wo so a Sach scho echd guud war, nacherd verbesserd worrn is, schlechder wår und ledzdendlich nacherd widder ann Drennd eigleid hadd, mid so a boar Schlaumeier, wo dess nacherd widder so gmachd hamm, wie unner Eldern und Grouseldern. Des dann als den ledzden Schrei verkäffd hamm und fürn Arschgeld verkauff du.

Wie auch immer edz hab ich mich amål widder in Rasche geredd. Hab ich ja a gwolld. Habs am Afang gsachd. Mir gehds edz besser. Un wenn ihr a weng was zum lachn ghabbd habd, nacherd hads sein Zwegg a dobbld erfülld.

Nacherd könnder edz lächelnd neis Wochnend geh…
Dschau, arrifedertschi, euer Gerd

Ihr könnt alle lieferbaren Artikel
im Webshop bestellen oder via e-mail im Laden anfragen

• Kategorie: Gerd solo , Mini Podcast , Sprecher Gerd , Vom Låden und vom Leben
• Keine Kommentare