hermkes romanboutique

von Gerdam 15. November 2024

Podcast: Play in new window | Download (Duration: 6:46 — 9.9MB)

Subscribe: RSS | More

Vom Låden und vom Leben Nummer 31 – verzeddln – reflexiefe Verbn

(…wie immer zum hören und mitlesen oder lesen und mithören, ganz wie ihr wollt)

Vom Låden und vom Leben
(audiofile #31: verzeddln – reflexiefe Verbn)

Verzeddld

Servus ihr Liem dordd draussn. Ich bin gråd a weng fluggduadief. Will såch, dass ich mich a ab und an a weng verzeddl. Nacherd kommds a ab und an zunnem Fehler. Vor a boar Wochn zum Beischbiel hab ich ennen vo unnern Feisbuck un Insdagramm Eidräch verdaddld. Kam nacherd hald a boar Dåch schbäder. Blöd, awer leider ned immer zum ändern. Wennsde viel machsd.

So Wörder, wie verzeddln sin reflexiefe Verbn. Also Dunwörder, wo sich auf sich selber beziehn. Ich verzeddl mich, du verzeddlsd dich, der anner verzeddld sich un so weider. Im Blural gehds a. Und ich glebb, dass des Word derzeid fasd immer nein Blural ghörd. Weil mir uns alle verzeddl du.

So schö, wie des is, dassmer heud eichndlich alles bekomm ko, wasmer möchd. Und dassmer a nahezu alles broduzier ko, wasmer sich ausdenggd had. Awer echd ezd. Zuviel is hald a ned guud. Zu viel is zu viel. Des ganze Zeuch, wasmer konsummier könnd oder solln, schbrenggd den Rahmen vonnerer Leemsschbanne. Obs nacherd Sdrieming is, Büchli, vo wessder Geier wie vieln Gleeverlächli und Selfbabblischern, oder Schbiele, wo sich mancherdsmål blos marchinål unnerscheid du, firrduell, annalooch, diggidål. Omnibräsend, fordernd, verwirrend, üwerfordernd. Kä Wunder, dassde bein ennzelne Broduggd auf kä Mengen mehr komm dusd. Mussd dich hald abheeb. Vo derre Masse. Mussd besser sei. Bekannder. Schneller. Imberdinnender.

Mussd dich dreh und wend. Auf souschl Midia. Middener Webseid. Innerer Bresse. Weil die grossn dir sonsd immer mehr vo deim Kuchnschdüggle abnemm du. Und weils zu dem Elend mid unnern heudichn Möchlichkeidn ehm a noch für a ganzes Heer vo Selbsdvermargdern, Selfbabblischern, Migrofirmli, Miniläibls gebb dud, wo ihrerseids a glenns Schdüggle vo dem Kuchn abhab wolln. Alles had sich verzeddld.

Und weil du dich edz drum kümmern mussd, dass dei Schdüggle vom Kuchn ned glenner wird, als dei Rendabbilidädsgrenze des vorgebb dud, isses kei Wunder, dassde dich ab und an a verzeddlsd.

Bernies Lieblingsschbruch in dem Zusammenhang is: Eichndlich wolld mer blos Bücher verkäff.

So isses hald ned. Heud brauchmer a schdeuerliche Finanzabbdeilung. A Webseidnbedreuung. Enn soschäl Midia Bedreuer. En Iwendmänädscher. und so weider. Leisd kömmer uns die Bösdli nadürlich nedd, middn immer glenner werdndn Andeil am Kuchn. Also müssmer des alles selber schdemm. In Bersonålunion. Des buschdd den Alldåch arbeddsandeilich ganz schö nei die Hö. Dassde dich nacherd in derre verzeddldn Weld selber a ab und an verdzeddln dusd, is echd kä Wunner.

Wie des mid em verzeddln so läffd, kann ich euch annem ganz eefachn Beischbiel verglär. Den Ardiggl hab ich ågfanggd mid denne reflexiefn Verbn. Die duds in allermöchlichn Schbråch gebb. Und in fassd alln Schbråchn, wo mir bekannd sin, gibbds bei denne und mid denne unglaublich viele grammaddikålische und schbråchlogische Broblemmli. Da dusd dir manchmål nan Kopf lang.

Im Deudschn is des ausnahmsweise amål relladief konsisdend und logisch.

Ich du mich verzeddln, wenn ich selber an Misd bau, vor lauder Arbeid.
Du dusd dich neifreu, wennder was schönnes zu Deil wird.
Sie dud sich schäm, für ihrn dummen Mo.

Mir dun uns wasch, damid mer ned schdingg du.
Ihr duds euch gräm, weildsder neulich ned uff derre geiln Lesung wård.
Un die annern hamm sich droffn, um dabei zum sei.

Bei reflexiefn Verbn is des Subjeggd und des Objeggd immer des selbe. Normalerweise. Awer ich habs ja scho gsåchd. A ganz a grumme Ausnahme duds gebb:

Wennsde dich üwer was freu dusd, und des nacherd dem, wos iniziierd had a verzähl willsd, nacherd hassde im Deudschen a boar Möchlichkeidn.

"Herzlichn Dångg, liebe Hanna-Linn, für den schönnen Leseåmnd."

oder

"Ich dangg dir für dein Einsadz. Wår der Hammer."

Awer es gibbd da a a reflexief Form, die awer eichndlich goar ned bass dud.

Wieso zu Deufl dud mer sich bedangg?

Ich bedangg mich für des dumme Gschmarr, oder was? Was haddn des Reflexiefbronnomen da zum such? ich du ja ned mir dangg, sonnern wem annersch? Des Reflexiefbronnomn beziehd sich ber Definizionem awer auf des Subjeggd. Und des bin ja ned ich, sonnern wer annersch.

Da könnder edz amål drüwer nachdengg.

Awer ned zu lang und zu viel. Sonsd duds ihr euch blos verzeddl. Hab ich glebb ich edz a. Awer damid is des ja nix annersch, wie des, was ich eh scho zugehm hab, dasses mir ab und an bassierd. War also zum erwårdd. A selbsderfüllende Broffezeiung also.

In diesem Sinn, a schönns Wochnende. Dschau, arrifidertschie, euer Gerd.

Ihr könnt alle lieferbaren Artikel
im Webshop bestellen oder via e-mail im Laden anfragen

• Kategorie: Gerd solo , Mini Podcast , Sprecher Gerd , Vom Låden und vom Leben
• Keine Kommentare